الخميس، 22 أبريل 2010

من يومه متعوس.....



ناوى على يازمن وهتعمل فيا ايه؟؟

غلبان يا ناس ف حالى والدنيا عليا ليه؟؟

والله عارف حظى من يومى وانا متعوس..

والعيشه ياربى صعبه وكله عمال يدوس

لانا عايز اكون مدير ولا عايزابقى بيه.

دنا بس حلمى اشوف منظر العشره جنيه

وانا يعنى هعمل ايه اروح اشتغل شحات

ولا اقف ع النواصى واعاكس ف البنات

قولت اشتغل حلاق............

رحت للاسطى زينهم

بصلى بعنيه وقالى ..اهلا

هوانتا منهم..؟

معلش يا بنى اسف مش هقدر اشغلك

شغلنى طب صبى وانا مش هزعلك

امشى من هنا يا واد ..

ويللا مش فاضيلك

وشوفلك حته تانيه تقلب فيها عيشك

وانا يعنى هعمل ايه ...؟

يعنى اشتغل شحات ؟

ولا اقف ع النواصى واعكس ف البنات...؟

دلونى على عم جمعه بيسرح ف القطر بترمس

وجريت ع المحطه اشوف موضوع الترمس

ولحقته ف اخر لحظه متشعبط ف القطر

واخيرا كلمته وعرضت عليه الامر..

موافق بش شوف انا ليا عندك شرط..

وانا معاك ياسيدى لحد اخر الخط

سالنى راس المال ومد ايده هاااات

وسالنى بكل فقاقه انتا بتعرف لغات..؟

طلعت انا من هدومى وكنت همسك فيه

لولا ولاد الحلال بعدونى عن ايديه

وانا يعنى هعمل ايه؟

اروح اشتغل شحات ؟

ولا اقف ع النواصى واعاكس ف البنات..؟

طقت ف دماغى فكره بس ايه... عاليه

اروح مع الواد جارنا اللى مسافر ايطاليا

بعت كل اللى حيلتنا وعملت كام جمعيه..

لحد بس مارجع واسدد اللى عليا

وتوهت هناك ف سكك ودخلت ف متاهات

دحنا مدفونين تعالى ياامه شوفى فلوس وعربيات

هاللو عليك يا بيه وانتا شبه فاندام

جودمورننج يا عم مستر اهلا يا حجه مدام

حصلتلى هناك مشاكل والخلق مفيش تفاهم

قال وانا اللى قولت فرجت اترينى كنت واهم

مره اتنصب عليا وخدوا كل الفلوس..

ولجل حظى لاسود قالوا عليا جاسوس..

قولت ارجع لبلدى وناسى اهل بلدى

وامى لما شفتنى تعالى ف حضنى يا ولدى

وبعد تفكير عميق عرفت انا هعمل ايه..

هروح اشتغل شحات...

وهقف ع النواصى وهعاكس ف البنات.

هناك 10 تعليقات:

NeVeN يقول...

والله يامونتى انتى سكرة ودمك شربات
صحيح يعنى هو احنا هنعمل ايه
ولا هنشتغل ايه دة موال الشغل دة هم مايتلم
بس سيبك احلى حل انتى قولتيه
اننا نشتغل شحاتين ونعاكس البنات
بصى احنا نعمل جمعية ومنقبضهاش


مساءك كابتشينو

MONTY يقول...

مش كده ونبى يا نوفا
الشباب محبط وقربوا ينتحروا لحد مامركز الشباب هيخلص
يالا بخاطره بقا ايكش يولعوا
المهم يا قمر انا بشكرك جداااااااااا على تعليقك وانك اول ضيفه دا شيء يشرفنى بوسيلى لارا

ســـهــــر يقول...

ههههههههههه
اه يانى يا نحس
بصى يا مونتى ياحبى الاول وقبل الاخير
بينى وبينك انتى مش نحس بس لا دة انتى كمان بتنحسى اللى حواليكى واللى بعيد عنك حوالى خمستاشر كيلو جرام هههههههه

لا والله بجد بوست حلو اوى يا مونتى واوعى تخلى الفكرة تسيطر على دماغك يا قمر يا ست الكل واخدة بال سيادتك انتى ؟ ههههههههه

سمع هوص (Abo 3li) يقول...

ههههههههههههههههههههه....
والله انتي فقرية...
طب خديني معاكي علي النواصي علشان نعاكس البنات سوا...

مهموهة أحمد يقول...

لا بجد بوست رائع رائع و الله يا مونتي
بجد واقعي اوي
و حكيتي اللي بيمر بيه كل الشباب المصري المتدهور و الله

يللا ربنا ما يجعل الشباب شحاتين و لا يوقفوا على النواضي يعاكسوا في البنات

ربنا يوفق كل الناس يا رب
و يهدي كل الناس يا رب

سعيدة اوي بيكي يا حبيبتي

خالص حبي و تقديري

MONTY يقول...

مهمومه
شكرا ليكى ولمتابعتك وادينى اهوه يا ستى عملتلك كوكتيل رى ما قولتلك
ويارب ما نشوف حدبيعاكس البنات ولا بيشحت
كفايه اوى اموجودين
منورانى والله يا قمر

MONTY يقول...

ابوعلى
والله مش مسالةفقريه انت عارف ان دا الواقع بس زى ما بيقولوا هم يبكى وهم يضحك ادينا بتريق على نفسنا
لاننا شعب اصلا دمه خفيف وبيحب يسخر من
نفسه
وكلنا فقريين والله ههههههههههههه
بشكرك يا جميل يا منورنى

MONTY يقول...

سهوره حبيبة قلب مونتى والله
انا نحس ماشى
عموما لوكده يبقى انا زمانى بهت عليكى وبقنا احنا الاتنين نحس يا روحى
وبعدين دنا لسه هشبعك نحس وفقر وكله
استنى انتى بس
منوره وشرفتينى والله ووحشتينى

أحمد طه يقول...

يا افندم مش عارف اشكر حضرتك ازاي

جبتي من النهاية

على أقرب رصيف تجدوني

غير معرف يقول...

هههههههههههههههه
أنتي عسل اوى مونتي
تحفه بجد والله
تحياتي : Waled almarghny

 
Wordpress Theme by wpthemescreator .
Converted To Blogger Template by Anshul .