الاثنين، 6 يونيو 2011

يرحلون..

كلهم يرحلون يتركونك وحدك



ويذهبون



كلهم يرحلون يسكنون قلبك ..



وعن عيونك يبعدون



وتبقى انت بين اطلال وزكريات



للغائبون



تبحث عنهم ولا تجدهم وتعلم انهم



لايرجعون



يوعدون بألا يفقدونك وها هم لوعودهم



يخلفون



وتعيش وحدك ف الظلام واهما انهم اليك



سوف يعودون



يوم ان فقدتهم وانت فى جحيم وتتساءل



هل هم مثلى يتعذبون؟



يرحلون ويتركون آلاما ودموعا بعيونك



لايتوقفون



وتدوربرأسك افكار وخيالات ويأسك وهمومك معك



يتحاورون



وتحدث نفسك بالساعات وتسألها وتصير



كالمجنون



وتلعن السنين والايام ولا تدرى انهم لك



هم اللاعنون



كانت لديك مملكة هم ملوكها والآن على عرش من



يتربعون؟



كانوا لك الحياه وكانوا لقلبك



يملكون



وكنت لأجلهم تحيا وهم من كانوا بك



يهتمون



فرحلوا وصرت وحيدا وليس لديك سوى صراخ



قلبك المطعون



فاترك الأمراذن لله فهومفرجا للكرب ومدبرا



للكون.


القصيدة عنوانهاوفكرتها تقريبا مستوحاه من صديقه عالمدونه بس ده من فتره طويله


بس انا بجد مش فاكره مين صاحبته لانى من زمان بعيده عن المدونه .وهو قريب منه بعض الشئ وانا بوجه لها تحياى .

الثلاثاء، 24 أغسطس 2010

حرقة قلب


ف قلب بتنا سمعت صوت نواح..صراخ.. وشفت لمه
توهت ف زحمة ناس كتيره بيطبطبوا على كتفى ويحضنونى... ولما سألت كانت اجابه واحده
أخوكى مات.....
ايه؟؟؟؟ مااااااااات؟؟؟؟؟؟؟؟
ايوه حبيبك .. صاحبك .. اللى كان ملازمك مات ..ومات غريق .. مات شهيد
نور عينك خلاص انطفى .. قلبك خلاص اتحرق .. ياللا اصرخى وابكى من جواكى واحزنى
هو دا الحزن الحقيقى اللى عمرك ماجربتيه.
خده البحر منك .. خد شبابه ..خد جماله ..خد رجولته .وجدعنته.. خد خفة دمه وشجاعته..
خد حنية قلبه ..خد روحك اللى كنتى عايشه بيها ..
خد شمعتك الوحيده اللى كنتى ف عز الضلمه تنوريها..
مين ده اللى شايلينه سته من نفس سنه؟
دا اللى كان معايا من يومين؟؟؟ دا اللى كان بيحكيلى ويكلمنى وضحك معايا ضحكتين؟؟
دا الى كان ف حضنى وضمنى وقاللى افتكرينى .. وكان بيسخر منى لما اقوله لوعى تقول كده ..دا انت ف قلبى
روحى وضى العين
مين اللى نايم ف سريره بجسده .. ووجه المنور وعينه نجمتين؟؟
دا اللى نايم بجسمه ؟ بس طب و روحه ياناس راحت فين ؟
مين دا اللى غسلوه وكفنوه وراحوا يصلوا عليه؟؟
مين دا اللى كانت جنازته الله اكبر زى يوم الدين؟؟
دا اللى كل الدنيا مشيت وراه وحزنت عليه؟
انا ف زهول !!!!!!
انت اخويا جليسى وونيسى وصديقى وحبيبى وكل اللى عندى ؟
رااااح؟؟؟!!؟
طيب قولولى راح فين ؟... عشان ادور عليه
دنا ياما سهرت استناه ولما يرجع ساعتها بس تغمض لى عين
لالالالالالالا .. انتوا ناس كدابين.. ايوه فعلا... بتدعوا بالرحمه لمين؟
لا ابدا مش مصدقاكوا .. اوعوا تقولوا انه واقع حقيقى واكيد لأدا كابوس
اوعوا تقولوا انه مات .. حتى لو كان مات شهيد
يعنى ايه؟؟
محدش تانى هينده عليه؟؟!
مين اللى هيكلمنى .. ويضحكنى .. ويحكيلى عن مغامراته.. وحب البنات فيه
مين اللى هيستعطفنى عشان اصالحه لما اجافيه؟؟
وعمرى ما اخاصمه لانه عارف ان روحى دايبه فيه
دنا عمرى ما اتحملت النسمه عليه
مين اللى هيقولى انى ماليش حد غيره وانى بعده انا مسواش وانى ماليش سند بعديه
كنت اتمنى عمرى ينتهى قبل ما اعيش اللحظه دى
مبقتش تفرق عندى حاجه .. خلاص ضاعت كل حاجه
راح نور عين امى .. انكسر عكاز ابويا .. وانا انتهيت .. الف رحمه عليك يا خويا
خلصت حكاياتك م الدنيا .. والغريبه انى حاسه بغربه ف وسط ناسى واهلى
حاسه انك جاى وانا مستنياك .. وهفضل ابكى عليك عمرى كله .. وانا عارفه ان دموعى مش مرجعاك ف دار النعيم ..و جنات الخلد.. يا عريس الجنه.

الاثنين، 23 أغسطس 2010

حرقة قلب


أسألكم الدعاء والفاتحه لأخى الوحيد الذى ترك الدنيا ورحل عنها فى هذه الأيام الكريمه شهر رمضان


اسكنه الله فسيح جناته

الجمعة، 9 يوليو 2010

حريتك....


حريتك... راسك تكون مرفوعه
حريتك... كلمتك تبقى مسموعه
حريتك..مش انطلاقك وتحكمك
حريتك.. مش شيء هزيل يحكمك
حريتك .. مش بعد وسفر وترحال
حريتك ف بلدك مهما تكون الأحوال
عقلك مايخفش .. حريه
قلبك فيه اراده.. حريه
احمى دينك وارضك واهلك
واحمى كرامتك ونفسك ل تهلك ..
عيش تحت سماك حر
وعشان مشكله اوعى تفر..
حريتك شجاعتك مش كسوفك..
عيش حر واخرج من خوفك..
حريتك السعادة الأبديه..
بالفعل وبالكلام ..حريه.

الأحد، 4 يوليو 2010

وحشتوووووووونى

وحشتونى جداااااااااااا

واشتاقت ليكم جداااااا رجعالكم تانى ان شاء الله

ووحشتنى كلماتكم الرائعه واللى بحبها

الجمعة، 4 يونيو 2010

عدت سنه....

زى النهارده.... من سنه
كنت معاك بحلم انا..
واهى عدت سنه وانا لسه انا
كنت بكل كيانى معاك..
كنت عايشه ..كنت ساكنه ف حضن هواك
اه كانت ساعات ..
عايشتنى اجمل لحظات
صحيت جوايا ذكريات..
كانت من كام سنه..
واهى عدت سنه
وانا لسه انا ..
وانت بعدت ..وانا اتعذبت
ولسه مكانى ..
بلعن صمتى وضعفى ..بلعن يأسى
وظلم زمانى
فاكر مكاننا ووقت لؤانا؟؟
اد ايه حبينا ..اد كان لاشتياق جوانا
كنت اخر مره تضمنى ..
قولت انك بعد السنين لسه بتحبنى
واهى عدت سنه ..
وانا لسه انا..
كنت حاسه بالنهايه
كنت جنبى ..وحسيتك مش معايا
شفت ف عنيك وداع..
حسيت ف قلبى ضياع
وحده ..ضلمه وخوف جوايا
توهت جوه ملامحك
معرفتش ايه الحكايه..
فاكر ليلتها ؟؟؟
فاكر قولت ايه ساعتها؟؟
قولت انسينى ..وابعدى قلبك عن حياتى
وبكل قسوة بترمى كل عمرى..
وذكرياتى..
مافيش حاجه يتخلد..
هوا ده كان كلامك..
اعتبرينى قلب ميت
ازاى نطقها لسانك؟؟
بكل كلمه كنت بتجرحنى
حسيت طعنات ف قلبى ..
راجع تتناسى حبى..
ومات كل شيئ يفرحنى
هديت جوايا امل حاولت ابنيه
قتلت كل شئ انا عايشه بيه..
دوست على ايامى الجايه..
وبكل بساطه بتنسحب من ايامى ..
ومن لياليا..
لكن عمرى ف يوم ما هندم
حتى لو بطلت احلم ..
اعتبرتك ذكرى ف عمرى
رغم حزنى ..ورغم جرحى ..
هتعيش على طول ف قلبى.




السبت، 29 مايو 2010

تاج ..... على راسى


السلام عليكم ورحمة الله وبركاته..
جالى التاج ده من حبيبة قلبى مها(مهموهه) ومن الرقيقه داليا(القمر الباكى)
وانا بشكرهم جداااا.
وكان المفروض انى ارد من فتره , بس بصراحه مكنتش مستوعبه الفكره كويس
لان من شروط التاج اولا: انك لازم تتكلم عن ستة اسرار لا يكتشفها من يقابلك لاول مره
"مش عارفه كده هيبقوا اسرار ازاى؟" ما علينا
والشرط الثانى :انك تهدى التاج لستة اشخاص معينين
هنبتدى بالناس اللى ههديليهم التاج وهم:
مها(مهموهه)
سهر (ساسوو كافيه)
ابو على (سمع هص)
وليد (هى وظروفها)
داليا (القمر الباكى)
نتكلم بقى عن الست اسرار اللى ميكتشفهاش اللى يقابلك للمره الاولى :-
1_ مش ممكن يتخيل انى عصبيه وبتنرفز بس مش بسرعه.
2_ ممكن يفتكر انى كتاب مفتوح لاى حد لكن الحقيقه ان مش كل حاجه لازم اقر بيها من اول مره لاى حد والسلام.
3_ممكن يفكر انى مجنونه او مستهتره على اساس يعنى انى بحب اهزر واضحك..لكن انا برضه جاده وبحب الهدوء وكتير احب اكون لوحدى ومحبش الأزعاج والصوت العالى.
4_لما حد يضايقنى معرفش ارد عليه ف وقتها ممكن ارد عليه بعد شويه ورد يحبطه .
5_ميعرفش انى لما اكون ف قمة الضحك والتهريج والسخريه من نفسى ....ابقى كده ف قمة حزنى ويأسى.
6_ممكن يفتكر انى متكبره شويه ...لكن بالعكس انا عاديه جداا وبحترم كل اللى يحترمنى ويقدرنى ومباحبش ابص على حد من فوق لانى مش شايفه نفسى حاجه مهمه او كبيره عادى يعنى.
 
Wordpress Theme by wpthemescreator .
Converted To Blogger Template by Anshul .