الثلاثاء، 24 أغسطس 2010

حرقة قلب


ف قلب بتنا سمعت صوت نواح..صراخ.. وشفت لمه
توهت ف زحمة ناس كتيره بيطبطبوا على كتفى ويحضنونى... ولما سألت كانت اجابه واحده
أخوكى مات.....
ايه؟؟؟؟ مااااااااات؟؟؟؟؟؟؟؟
ايوه حبيبك .. صاحبك .. اللى كان ملازمك مات ..ومات غريق .. مات شهيد
نور عينك خلاص انطفى .. قلبك خلاص اتحرق .. ياللا اصرخى وابكى من جواكى واحزنى
هو دا الحزن الحقيقى اللى عمرك ماجربتيه.
خده البحر منك .. خد شبابه ..خد جماله ..خد رجولته .وجدعنته.. خد خفة دمه وشجاعته..
خد حنية قلبه ..خد روحك اللى كنتى عايشه بيها ..
خد شمعتك الوحيده اللى كنتى ف عز الضلمه تنوريها..
مين ده اللى شايلينه سته من نفس سنه؟
دا اللى كان معايا من يومين؟؟؟ دا اللى كان بيحكيلى ويكلمنى وضحك معايا ضحكتين؟؟
دا الى كان ف حضنى وضمنى وقاللى افتكرينى .. وكان بيسخر منى لما اقوله لوعى تقول كده ..دا انت ف قلبى
روحى وضى العين
مين اللى نايم ف سريره بجسده .. ووجه المنور وعينه نجمتين؟؟
دا اللى نايم بجسمه ؟ بس طب و روحه ياناس راحت فين ؟
مين دا اللى غسلوه وكفنوه وراحوا يصلوا عليه؟؟
مين دا اللى كانت جنازته الله اكبر زى يوم الدين؟؟
دا اللى كل الدنيا مشيت وراه وحزنت عليه؟
انا ف زهول !!!!!!
انت اخويا جليسى وونيسى وصديقى وحبيبى وكل اللى عندى ؟
رااااح؟؟؟!!؟
طيب قولولى راح فين ؟... عشان ادور عليه
دنا ياما سهرت استناه ولما يرجع ساعتها بس تغمض لى عين
لالالالالالالا .. انتوا ناس كدابين.. ايوه فعلا... بتدعوا بالرحمه لمين؟
لا ابدا مش مصدقاكوا .. اوعوا تقولوا انه واقع حقيقى واكيد لأدا كابوس
اوعوا تقولوا انه مات .. حتى لو كان مات شهيد
يعنى ايه؟؟
محدش تانى هينده عليه؟؟!
مين اللى هيكلمنى .. ويضحكنى .. ويحكيلى عن مغامراته.. وحب البنات فيه
مين اللى هيستعطفنى عشان اصالحه لما اجافيه؟؟
وعمرى ما اخاصمه لانه عارف ان روحى دايبه فيه
دنا عمرى ما اتحملت النسمه عليه
مين اللى هيقولى انى ماليش حد غيره وانى بعده انا مسواش وانى ماليش سند بعديه
كنت اتمنى عمرى ينتهى قبل ما اعيش اللحظه دى
مبقتش تفرق عندى حاجه .. خلاص ضاعت كل حاجه
راح نور عين امى .. انكسر عكاز ابويا .. وانا انتهيت .. الف رحمه عليك يا خويا
خلصت حكاياتك م الدنيا .. والغريبه انى حاسه بغربه ف وسط ناسى واهلى
حاسه انك جاى وانا مستنياك .. وهفضل ابكى عليك عمرى كله .. وانا عارفه ان دموعى مش مرجعاك ف دار النعيم ..و جنات الخلد.. يا عريس الجنه.

هناك 19 تعليقًا:

P A S H A يقول...

إنا لله وإنا إلأيه راجعون .. ربنا يرحمه يا رب ويسكنه فسيح جناته .. نسأل الله أن يغفر له ذنوبه ببركة الأيام المباركة في شهر القرآن .. ربنا يصبركم يا رب

Ms Venus يقول...

انا مش عارفة اكتب ولا حرف

ســـهــــر يقول...

الله يرحمه مش عارفة اكتب اقول اية
كل اللى اعرفهم عزونى فيه من كتر حزنى عليه ربنا يرحمه وينور قبرة اللهم امين
الخبر منك ليا كان صدمة ولس صوتك بيرن فى ودانى لا اله الا الله
ربنا يرحمه ويصبرك ويجعل مثواه الجنه اللهم امين

غير معرف يقول...

الله يرحمة ويجعل مثواة الجنة ويصبرك

richardCatheart يقول...

اسأل له الله التقبل

وبدعلكم ربنا يصبركم ويبرد قلبكم يارب

الله يعنكم الله يعينكم

ليله شتاء يقول...

لاحول ولا قوة الا بالله
ان لله وانا اليه راجعون

فكرة من الزمن ده يقول...

انا لله وانا اليه راجعون ربنا يغفر له ويرجمه ويصبركم

Tarkieb يقول...

ربنا يصبرك ويرحمه

NeVeN يقول...

الله يرحمه يا مونى اجمدى كدة
ربنا يصبر مامتك ويصبرك انتى واخواتك
معلش معرفتش جيلك لانك عارفة الظروف
اللهم انقله من مواطن الدود وضيق اللحود الى جنات الخلد والخلود
قولى امين وكل متفتكريه ادعيله نفس الدعاء دة

Silver Eyes يقول...

لا اله الا الله
البقاء لله

ربنا قادر يصبركوا يارب
ربنا يرحمه ويغفرله ويبدل سيئاته حسنات
انا لله وانا اليه راجعون

القمرالباكي يقول...

السلام عليكم ورحمه الله وبركاته

انا لله وانا اليه راجعون
ربنا يرحمه ويدخله جناته ويلهمكم الصبر والسلون
ربنا يصبركم

من كل بستان زهرة يقول...

مونتي يا حبيبتي

أخبارك أيه طمنيني عليكي

وحشتيني جدا يارب ترجعلنا بألف سلامة

فكرة من الزمن ده يقول...

فينك يامونتي

Ms Venus يقول...

مونتى

طمنينا عليكى حبيبتى بليز


يارب تكونى بخير


وحشتينا بجد

افروديت يقول...

ربنايرحمه وجميع موتانا وموتي المسلمين..ربنايصبركم علي فراقه ويسكنه فسيح جناته.

Tarkieb يقول...

كل عام وانتم بخير

غير معرف يقول...

فى بعض الاحيان يعجز اللسان عن الكلام
لكن فى حالتك عجز الكلام ان يصل الى اللسان
تذكرى بكاء الصحابه على فراق الرسول
ثم نذكرى بكاء ابويك على ابويهما وهكذا
لودامت الدنيا لغيرنا ماوصلت الينا
اسأل الله الحليم العظيم
ان يرحم أخاك فهو أرحم الراحمين وأن يمن عليه بالكرم
فهو المنان ذو الجلال والاكرام
تابعينى على مدونتى ميتوموون
وهاكتب موضوع قريب
عسى أن يصبرك

محمود(باحث عن حب) يقول...

انا لله وانا اليه راجعون

ينسون البسيط يقول...

طبعا مافيش حزن يقدر يريح بال اللى فارق حبيبه
ولا اي كلمة تواسي غير اننا لله وليه راجعين كلنا
لكن يا مونتي
ورغم اني ماعرفكيش الا اللحظه
لكن لو كنت انا مكان اخوكي الله يرحمه
اكيد كنت حبقا مبسوط فى مكانى البعيد
لو حسيت انك تخطيتي احزانك
وبصيتي لقدام
ماتنسيش اخوكي حبيبك
لكن ماتسبيش الحزن يأسرك فى مكانك

صدقيني هوا اكيد فخور بيكي
لاني شخصيا لو كان ليا اخت زيك
كنت حفتخر بيها جدا

اسف اني كلامي ملخبط..
بس الموقف فتح عندي جرح قديم

 
Wordpress Theme by wpthemescreator .
Converted To Blogger Template by Anshul .